Redacçom / Fôrom muitos centos de pessoas as que colapsárom no dia de onte as ruas da Corunha, convocadas de urgência polo possível desalojo da Casa das Atochas. A ameaça de desfiuçamento está mui presente, desde que o prazo para o abandono voluntário do centro social rematou na passada quinta feira. A mobilizaçom pujo de manifesto os importantes apoios que, nos movimentos sociais e nas gentes com inquedanças culturais, suscitou o projecto da Atocha Alta, e culminou umha semana mui intensa de actividades lúdicas e reivindicativas.
A marcha arrancou do campo de Marte, que foi congregando dúzias e dúzias de pessoas arredor das reivindicaçons da 'Cultura Preocupa', colectivo que gere o projecto do bairro corunhês de Monte Alto. Fachos e bengalas dérom grande colorido à marcha, que chamava a atençom de boa parte das pessoas que passeavam polo centro da Corunha, no típico ambiente de consumismo desaforado das datas natalícias.
Ainda com um importante desdobramento policial, as unidades de intervençom e as polícia secreta decidírom-se pola estratégia da contençom, observando prudentemente a manifestaçom e tencionando que possíveis enfrentamentos nom deram mais ressonáncia à reivindicaçom do centro social. Isto nom empeceu que muitos manifestantes encapuçados exprimiram a sua ira contra os responsáveis do desalojo e alguns outros símbolos do sistema que padecemos. Assi, danárom as vidraças da promotora José Pérez Paz, que impulsa o desalojo, e deitárom pintura contra entidades comerciais, estabelecimentos de comida lixo e a subdelegaçom do governo espanhol. Também se pendurárom faixas desde andaimes de alguns prédios em obras.
O acto rematou nas instalaçons do centro social, onde se leu um manifesto animando à resistência contra o desalojo e à implicaçom de pessoas e colectivos na defesa deste espaço social.
Nova tirada do portal galizalivre.org
0 comentarios:
Post a Comment